Serliga í miðstaðarøkinum er sera nógv ferðsla eftir landsvegnum, og á fleiri strekkjum hava bilførarar ampa av, at seyður javnan gongur framvið og tvørtur um vegin. Hetta er ein støðugur trupulleiki fyri ferðslutrygdina. Hagtøl vísa, at seinastu 10 árini hevur seyður beinleiðis ella óbeinleiðis verið orsøk til sætta hvørt óhapp, sum árliga hendir á landsvegi.
Landsverk hevur støðugt roynt at bøta um ferðslutrygdina, og hevur gjørt avtalur við ávísar bøndur um vegsmogur og hegn, har seyður uttan at tarna ferðsluni kann koma tvørtur um vegin. Hetta hevur økt munandi um trygdina hjá bilførarum.
Landsverk hevur nú ætlanir um at fara víðari við at seta upp hegn framvið vegi á serliga útsettum strekkjum. Tað undrar tí Landsverk, at Búnaðarstovan, ið umboðar bøndurnar, og sum sigur seg taka undir við ætlanini um at fáa seyðin av vegnum við at hegna, ikki á nakran hátt vil taka medábyrgd fyri hegninum. Vanliga livitíðin hjá hegni er 20-25 ár, men har tøvur verður á tí, bjóðar Landsverk sær at skifta hegnið út longu aftan á 15 ár.
Landsverk hevur eisini gjørt vart við, at stovnurin vil traðka til, tá hegn verður skatt av t.d. kavarudding, ferðsluóhappi, skriðulopi ella í øðrum líknandi førum. Hinvegin heldur Landsverk tað vera uppgávuna hjá tí einstaka bóndanum, sum hevur sína dagligu gongd í egnum haga og lendi, at hava eftirlit við hegninum og syrgja fyri, at tað livir upp til krøvini um at halda seyði frá vegnum. Umráðandi er, at allir partar taka medábyrgd; hetta tó uttan tann stóra fíggjarliga ampan.
At hækka ferðslutrygdina við at seta upp hegn framvið landsvegnum er eisini eitt beinleiðis politiskt ynski, sum landsstýriskvinnan í innlendismálum, Annika Olsen, hevur sett fram. Harafturat hava fimm løgtingslimir úr trimum ymsum flokkum lagt uppskot fyri tingið um lógarbroyting, ið m.a. hevur til endamáls at fáa seyðin av vegnum. Sostatt sær tað út til at vera eitt breitt politiskt ynski um at bøta ferðslutrygdina á hesum økinum.
Faktaupplýsingar:
1,5 mió. krónur eru ætlaðar til hegnuppseting í ár
Í fyrstu atløgu er ætlanin at seta hegn upp framvið Vatnavegnum í Vágum, við vegin millum Leynatunnilin og bensinstøðina í Kollafjarðardali og framvið Kaldbaksvegnum.
Tey, sum vilja vita meira um hegnætlanina hjá Landsverki, kunnu venda sær til Oyvind Brimnes, stjóra, á tlf. 540 801 ella kunningardeildina á tlf. 540 804 og 540 805, sum kann vísa til rætta viðkomandi.